İşğal etilgen Qırımnıñ şeerlerinde Ukrayina destegine timsaller kene peyda oldı. "Sarı şerit" faalleri Aqmescit, Aqyar, Yalta, Kefe ve Kezlevni qaplap alğan aktsiya aqqında bildirdiler.
Areketniñ telegram kanalında aytılğanı kibi, şeer soqaqları sarı-mavı şeritler, yarlıçıqlar ve plakatlarnen yaraştırıldı.
"Şeritler, yarlıçıqlar ve plakatlarnı duraqlarda, parklarda, meydanlarda, yalı kenarları ve diger çoq adam olğan yerlerde körmek mümkün. Yerli sakinler daa bir kere ZSU ve işğalden qurtaruvnı beklegenlerini isbatlaylar", — dep aytıla faallerniñ muracaatında.
"Sarı şerit" teşkilâtı — Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.