"Rus cemiyeti" işğal etilgen Qırımda öz qurulışını inkişaf ettirmege devam ete — Aqmescit ve Aqyarda ofisler açıldı, rayon ve şeer bölükleri teşkil etildi, teşkilâtnıñ askerleri yarımadanıñ büyük şeerlerinde devriyecilik yapmağa başladılar. Bunı Qırım.Aqiqat mühbiri bildire .
Devriyecilikten ğayrı, askerler polis ve FSB reydlerine celp etile.
"Qırımnıñ "Rus cemiyeti"niñ müfrezesi uquq qoruyıcı organlarnen iş munasebetlerini qurdı, ve bizni endi uquq qoruyıcılarnıñ reydlerine celp eteler, esasen, qanun bozğan migrantlarnı tapmaq ve tutmaq içün qurucılıq obyektlerine çıqışlar. Bizni şeer bayramlarında tertip-nizamnı temin etmek içün de çağıralar, yaqında Aqyardaki qardaşlarımız "Sevastopol mudafaa müzeyiniñ doğğan künü" bayramında telükesizlikni temin etmek içün politske yardım etti", — dep tarif etti "Rus cemiyeti"niñ iştirakçilerinden biri.
Menbanıñ malümatına köre, Qırımda "Rus cemiyeti" resmiy qayd etilmeden faaliyet köstere.
İşğal etilgen Qırım territoriyasında "Rus cemiyeti" ile bağlı resmiy olmapan teşkilât peyda olmağa başladı. Onıñ iştirakçileri Qırım şeerlerinde devriyecilik yapmaqnı planlaştırğan "müfrezeler" teşkil ete.